ДУШАНБЕ, 26 июл — Sputnik. Тибқи иттилои Федератсияи муҳоҷирон, Вазорати умури дохилии Русия аз январ то июни соли равон 8 216 812 нафар муҳоҷири хориҷиро сабт кардааст.
"Аксари муҳоҷирон аз Узбакистон- 2 247 519 нафар, Тоҷикистон — 1 131 392 нафар, Чин — 663 779, Украина — 858 162 ва аз Қирғизистон 411 321 нафар мебошанд", — омадааст дар иттилоияи Федератсия.
Маскав дар меҳвари таваҷҷуҳи муҳоҷирон қарор дорад. Дар пойтахти Русия 855 ҳазору 580 муҳоҷири хориҷӣ сабт шудаанд.
Муҳоҷироне, ки ҳадафашонро кор нишон додаанд, дар Русия ба 2 миллиону 676 ҳазору 580 нафар баробар шудааст. Муҳоҷирони меҳнатӣ аз Узбакистон- 1 116 598 нафар, Тоҷикистон — 551 504 нафар, Украина — 238 655 ва Қирғизистон- 161 839 нафарро ташкил додааст.
Тайи моҳҳои январ — июни соли 2018 беш аз 126 ҳазору 412 нафар шаҳрвандии Русияро қабул кардаанд. Ин нишондод соли 2017 — 125 279 нафар ва 2016 ба 133 603 нафар баробар будааст.
Тайи шаш моҳи аввали соли равон шаҳрвандони кишварҳои зерин табааи Русияро гирифтаанд: Украина — 39 582 нафар, Қазоқистон — 21 266 нафар, Тоҷикистон — 16 324 нафар, Арманистон — 12 989 нафар, Узбакистон — 9 879 нафар, Молдова — 7 759 нафар ва Озарбойҷон — 5 668 нафар.
Ин дар ҳолест, ки Сумангул Тағойзода, вазири меҳнат, муҳоҷират ва шуғли аҳолии Тоҷикистон имрӯз, 26-уми июл зимни нишасти матбуотӣ дар Душанбе гуфт, феълан дар Русия 1 миллиону 121 ҳазору 337 шаҳрванди Тоҷикистон қарор доранд, аммо на ҳамаи онҳо муҳоҷирони меҳнатиянд. Ӯ теъдоди муҳоҷирони меҳнатии тоҷик дар Русияро 664 ҳазор нафар арзёбӣ кард.
