ДУШАНБЕ, 15 май — Sputnik. Дар фурудгоҳи Душанбе Александр Лукашенкоро сарвазири Тоҷикистон Коҳир Расулзода ва дигар шахсони расмӣ пешвоз гирифтанд.
Рӯзи 15 май маросими истиқболи расмии меҳмон дар назди Қасри миллат баргузор гардид, хабар медиҳад хадамоти матбуотии раисҷумҳури Тоҷикистон.
Эмомалӣ Раҳмон раисҷумҳури Беларус Александр Лукашенкоро гарму самимӣ истиқбол гирифта, ба болои шоҳсуфаи ифтихорӣ даъват кардааст.
Маросими истиқбол бо гузориши фармондеҳи Горди фахрӣ, садо додани сурудҳои миллии ду кишвар, гузаштани сарони давлатҳо аз назди қатори сарбозон, арзи эҳтироми меҳмони олимақом ба Парчами давлатии Тоҷикистон, шиносоӣ бо ҳайатҳои расмии ду ҷониб ҷараён гирифта, бо гузашти низомии ҷузъу томҳои Горди фахрӣ аз назди сарони ду давлат анҷом ёфтааст.
