ДУШАНБЕ, 3 апр — Sputnik. Вазорати умури дохилаи Тоҷикистон хабар медиҳад, ки дар шаҳри Конибодом раиси ҷамоат ба иттиҳоми ришваситонӣ дастгир шуд.
Бино бар иттилои манбаъ, Ҳайдар Усмонзодаи 55-соларо кормандони милисаи чанде пеш ҳангоми гузаронидани амалиёти бозҷӯӣ дастгир карданд.
"Раис, ба воситаи миёнарав, сармуҳосиби хоҷагии деҳқонӣ, зани 53-солаи сокини ҷамоати деҳоти Ортиқов, аз зани 27-солаи сокини шаҳри Хуҷанд, барои омода намудани ҳуҷҷатҳои замини наздиҳавлигӣ 15000-сомониро талаб кардааст",- гуфта мешавад дар иттилои манбаъ.
Ҳайдар Усмонзодаро дар меҳмонхонаи "Шоми Қанд" ҳангоми гирифтани 15000 сомонӣ дастгир карданд.
Аз рӯи ин ҳодиса парвандаи ҷиноятӣ оғоз гардида, тафтишот идома дорад.
