ДУШАНБЕ, 20 мар — Sputnik. Бунгоҳи "Диссернет" панҷ олимро аз Тоҷикистон дар асардуздӣ айбдор кардааст.
Ҳамин тавр, намояндагони "Диссернет" ба Вазорати таълими Русия муроҷиат намудаанд, ки ду нафар олими тоҷик ─ Зафар Тайфуров (номзади илмҳои ҳуқуқшиносӣ) ва Назрулло Амиров (доктори илмҳои иқтисодӣ, намояндаи мардумии Маҷлиси шаҳри Душанбе) ─ аз унвонҳои илмияшон маҳрум карда шуданд.
Фаъолони ҷомеа дар расонаи худ навиштаанд, ки Назрулло Амиров матни рисолаи илмии Гончарова Н. З. "Рушди бозори маҳсулоти гӯшти чорво дар Русия: назария, методология, таҷриба"-ро, ки соли 2008 ҳимоя шудааст, бе такя ба муаллиф ва манбаи иқтибос, азони худ кардааст.
"Дисернет" таъкид мекунад, ки ҳангоми иқтибоси мавод, Амиров танҳо калимаи "Русия"-ро ба вожаи "Тоҷикистон" иваз намудаасту, халос. Матни боқимонда сад дар сад рӯйнавис шудааст.
Назарулло Амиров дар навбати худ эълом дошта, ки лағви дараҷаи доктории ӯ дар натиҷаи нодурустфаҳмӣ сурат гирифтааст, аммо ҷониби Русия ба гуфтаҳои ӯ аҳамияте надодааст.
