ДУШАНБЕ, 1 фев — Sputnik. Вазорати умури дохилаи Тоҷикистон гузориш дод, ки пирамарди 80-солаеро ба иттиҳоми қаллобӣ дастгир кард.
Бино бар иттилои манбаъ, ба Шуъбаи корҳои дохилии шаҳри Ваҳдат марди 48-солае шикоят кардааст, ки моҳи июли соли 2014, марди 80-солае аз деҳаи Муъминободи боло бо роҳи фиреб аз ӯ 75 050 сомониро гирифта то ҳол бар нагардонидааст.
Гуфта мешавад, ин пирамард бо ҳамин роҳ аз марди 43-солае аз деҳаи Андигон 4000 доллари амрикоӣ ва аз марди 46-солае аз деҳаи Ҳоҷиқатаған 2800 доллари амрикоӣ гирифта то ҳол бар нагардонидааст.
"Марди муттаҳам ба қаллобиро кормандони милиса дастгир карда шуд", — омадааст дар ин гузориш.
ВКД ҶТ барои бозҷӯии ин қазияҳо парванда оғоз карда ва тафтишотро идома медиҳад.
