ДУШАНБЕ, 22 янв — Sputnik. Виктор Никитюк, сафири Укроин дар Тоҷикистон ва Афғонистон, кушта шудани 7 шаҳрванди ин кишвар дар паи ҳамла ба меҳмонхонаи “Интерконтинентал” дар Кобулро таъйид кард.
“То кунун кушта шудани 7 шаҳрванди Укроин таъйид шудааст. Иттилоъоте, ки то кунун дар бораи кушта шудани шаҳрвандони Укроин аз гузоришҳои расонаҳо ба даст омадааст, бояд баррасӣ шавад”, — гуфт Никитюк ба хабарнигорон.
Пеш аз ин намояндаи расмии Дафтари хадамоти консулии Вазорати умури хориҷии Укроин Васил Кирилич гуфта буд, ки дар паи ҳамла ба меҳмонхонаи “Интерконтинентал” дар Кобул як шаҳрванди Укроин кушта шудааст.
Ёдоварӣ мекунем, ки 20 январ гурӯҳе аз ҷангҷӯён ба меҳмонхонаи "Интерконтинентал Отел" дар Кобул ҳамла бурда буд. Ба гузориши расонаҳои афғонистонӣ, дар ин ҳамла 43 кас кушта шуда ва 126 кас, аз он ҷумла 41 шаҳрванди хориҷӣ раҳо карда шудаанд.
Вазорати умури дохилии Афғонистон кушта шудани 18 кас, аз ҷумла 14 хориҷиро таъйид кард. Нерӯҳои амниятӣ 18 соат бо ҳамлакунандагон даргирӣ доштанд то тавонистанд буҳронро ҳалл кунанд. Масъулияти ҳамла ба меҳмонхонаро ҷунбиши тундрави "Толибон" бар уҳда гирифт.
