ДУШАНБЕ, 28 дек — Sputnik. Фардо, 29-уми декабр дар шаҳри Душанбе ҷашнвораи саросарии "Суруди сол — 2017" баргузор мешавад. Дар ин бора дафтари матбуотии Вазорати фарҳанги Тоҷикистон иттилоъ медиҳад.
Бино бар иттилои манбаъ, "Суруди сол — 2017" дар Филармонияи давлатии Тоҷикистон ба номи Акашариф Ҷӯраев соати 18:00 баргузор мешавад.
"Дар ҷашнвораи мазкур санъаткорони варзида ва шинохтаи ҷумҳурӣ бозёфтҳои нави эҷодии худро дар соли 2017 манзури ҳаводорони суруду мусиқӣ мегардонанд", — омадааст дар иттилои манбаъ.
Ҷашнвораи саросарии "Суруди сол — 2017" бо ибтикори Кумитаи телевизиону радиои Ҳукумати Ҷумҳурии Тоҷикистон дар ҳамкорӣ бо Вазорати фарҳанги Ҷумҳурии Тоҷикистон баргузор мешавад.
Аммо ҳануз феҳристи ҳунармандоне, ки дар ин ҷашнвора ширкат мекунанд, эълом нашудааст.
