Корномаи Эмомалӣ Раҳмон дар соли 2017

Дар оғози сол раисҷумҳури Тоҷикистон қарори муҳим қабул кард-раисҷумҳур раиси Душанбе Маҳмадсаид Убайдуллоевро аз вазифа барканор ва писараш Рустам Эмомалиро шаҳрдор таъин кард.

Рухдоди дигари моҳи январи соли 2017 бардоштани лимити барқ буд. Оғоз аз 14 январи соли 2017 ҳамаи муассисаҳои иҷтимоӣ ва манзилҳо ҳамешагӣ бо барқ таъмин шуданд.

Дар баробири ин раисҷумҳур барномаи рушди кишварро то соли 2021 қабул кард.

Моҳи феврали соли 2017 Эмомалӣ Раҳмон бо раисҷумҳури Русия Владимир Путин дидор кард. Дар давоми сафари ду рӯзаи Владимир Путин ба Тоҷикистон кишвардорон шаш санади ҳамкорӣ имзо карданду масоили соҳаҳои маориф, муҳоҷират, энержӣ, кишоварзӣ ва таҳкими амният дар Осиёи Марказиро баррасӣ карданд.

Дар ин дидор Владимир Путин барои саҳми арзанда дар таҳкими муносибот миёни кишварҳои Осиёи Марказӣ ба Эмомалӣ Раҳмон мукофоти олии Федератсияи Русия Ордени Александр Невскийро тақдим намуд.

Моҳи март Эмомалӣ Раҳмон раисони нави шаҳри Хуҷанд ва Истаравшанро таъин кард. Ба ин вазифаҳо Муҳаммадзода Маъруф ва Иноятзода Баҳром таъин шуданд.

Дар Рӯзи модарон раисҷумҳур ва писараш дар ҳашари умумӣ ширкат карданду дарахтони сояафкану ороишӣ шинонданд.

Моҳи апрел раисҷумҳури Тоҷикистон Эмомалӣ Раҳмон ба таъмири 15-килуметрии роҳ дар Душанбе оғоз бахшид. Ин тарҳ таъмири беш аз нӯҳ кӯчаҳои Душанберо дар назар дорад.

Ҳамчунин дар ин моҳ раисҷумҳур Акбар Насимзодаро сардори Раёсати Бозрасии Давлатии Автомобилии Вазорати корҳои дохилии Ҷумҳурии Тоҷикистон таъйин кард.

Моҳи май раисҷумҳури Тоҷикистон Эмомалӣ Раҳмон дар ҳошияи нахустин Нишасти сарони кишварҳои мусулмоннишин ва Иёлоти Муттаҳидаи Амрико дар Арабистони Саудӣ дар дастфишорӣ Доналд Трампро "шикаст" дод.

Дар ҳамон ҳамоиш Эмомалӣ Раҳмон ҳамчунин бо Шавкат Мирзиёев дидор кард.

Ҳамчунин дар моҳи май раисҷумҳури Тоҷикистон ба нерӯгоҳи Роғун сафар карда рафти сохтмони нерӯгоҳро шахсан раҳбарӣ кард.

Моҳҳои тобистон барои раисҷумҳури Тоҷикистон замони серкорӣ омад.Раисҷумҳури Тоҷикистон дабири кулли СММ Антониу Гуттеришро ба ҳузур пазируфт, бо вазири корҳои дохилии Русия Владимир Колоколтсев вохӯрду ба Арманистон сафар карда бо Серж Саргсян дидор ва мулоқот карда ба Қазоқистон сафар карду дар намоишгоҳи ЭКСПО-2017 ширкат варзид.

Дар баробари ин раисҷмуҳури Тоҷикистон вазифадоронро даъват кард, ки бо аҳолии кишвар бештар мулоқот кунанду аз шароити мардум бохабар шаванд.

Ҳамчунин раисҷумҳур Эмомалӣ Раҳмон раиси Дастгоҳи иҷроия Озода Раҳмонро рутбаи мушовири давлатии адлия дод.

Моҳи июл раисҷумҳури Тоҷикистон бештар ба мосоили дохилӣ машғул шуд. Ӯ фаъолияти нимсолаи ҳукуматро ҷамъбаст карду ба сохтмони роҳи Кангурт-Балҷувон-Ховалинг оғоз бахшиду раиси нави Кумитаи сайёҳиро таъин кард.

Ҳамчунин дар ин давра раисҷумҳури Тоҷикистон бо нахуствазири Покистон Муҳаммад Навоз Шариф дидор ва мулоқот кард.

Моҳи август Эмомалӣ Раҳмон қонуни танзиму ҷашну маросимҳоро ислоҳ кард.

Зимни сафар ба вилояти Хатлон раисҷумҳури Тоҷикистон нуқтаи нави марзиро миёни Тоҷикистону Афғонистон боз карду ба чанде аз сохтмонҳо оғоз бахшид.

Раисҷумҳур ҳамчунин ба чанде аз фаъолони ҷомеа мукофотҳои давлатӣ тақдим карду муаллимеро аз Қурғонтеппа хонадор кард.

Моҳи нахустини фасли тирамоҳ бо сафари раисҷумҳур ба Чин оғоз шуд. Дар мулоқот бо Си Ҷин Пин 24 санади ҳамкорӣ миёни Тоҷикистон ва Чин баста шуд.
Пасон Эмомалӣ Раҳмон ба V Бозиҳои Осиёӣ ба Ишқобод сафар кард.

Дар Тоҷикистон бошад раисҷумҳур сотмони роҳи Кӯлоб-Қалъаи-Хумбро ҳусни оғоз бахшид.

Моҳи октябр дар хонаводаи раисҷумҳури Тоҷикистон нохушӣ ба вуқӯъ пайваст. Бародари раисҷумҳур Нуриддин Раҳмон аз бемории сактаи қалб вафот кард. Ӯро дар оромгоҳи Ҳазрати Мавлоно Тоҷиддин ба хок супурданд.

Пас аз ин ҳодиса раисҷумҳури Тоҷикистон Эмомалӣ Раҳмон дар нишасти раҳбарони кишварҳои узви ИДМ дар Сочи ширкат кард. Дар Сочи раисҷумҳури Тоҷикистон бо Владимир Путин дидор ва мулоқот карда масоили рушди ҳамкорӣ ва таҳкими амниятро дар Осиёи Марказӣ муҳокима кард.

Пас аз бозгашт раисҷумҳури Тоҷикистон тағйироти кадрӣ амалӣ карда, аз ҷумла муовини аввали Вазорати рушди иқтисодро аз вазифа барканор кард.

Моҳи ноябр барои раисҷумҳур мавсими серкорӣ буд. Сафари дабири Шурои амнияти Русия Николай Патрушев ба Тоҷикистон, имзои 13 санади ҳамрокӣ бо раисҷумҳури Туркманистон Қурбонқулӣ Бердимуҳаммадов ва дидор бо вазири корҳои хориҷии Эрон Ҷавод Зариф.

Дар ҳамин моҳ раисҷумҳури Тоҷикистон Боғи ба номи Садриддин Айниро пас аз таъмир боз кард.

Дар ҳамин моҳ раисҷумҳур раҳбарони Кумитаи андоз ва гумрукро танбеҳ дод.

Эмомалӣ Раҳмон бо муҳассилин.

Моҳи ахири соли 2017 Эмомалӣ Раҳмон бо раисҷумҳури Белорус Александр Лукашенко дидор карду дар бораи ташкили намоиши маҳсулоти Белорус дар Тоҷикистон барои ба бозори Афғонистон баромадан ба мувофиқа расид.
Пасон раисҷумҳури Тоҷикистон ба Урдун сафар карду бо подшоҳи ин макон Абдуллоҳ ибни Ҳусейни II, 12 санади ҳамкориро имзо кард.

Дар умум фаъолияти сиёсии раисҷумҳури Тоҷикистон Эмомалӣ Раҳон бо сафар ба Маскав анҷом ёфт. Дар Маскав раисҷумҳури Тоҷикистон дар нишасти ғайрирасмии раҳбарони кишварони узви ИДМ ширкат кард.

Раисҷумҳури Тоҷикистон Эмомалӣ Раҳмон бо кишвардори Белорус Александр Лукашенко.