ДУШАНБЕ, 26 дек — Sputnik. Дар ин бора равобити умумии Вазорати корҳои хориҷии ҶТ хабар медиҳад.
Ба иттилоъи манбаъ, ин чорабинӣ дар ҳамкорӣ бо ниҳоди минтақавии бахши хусусии Бонки Рушди Исломӣ дар Малайзия ва Корпоратсия оид ба рушди тиҷорати байналмилалии Малайзия (MATRADE) рӯзи 21 декабр баргузор шудааст.
Дар он муовини директори иҷроияи Корпоратсия оид ба рушди тиҷорати байналмилалии Малайзия хонум Шаримаҳтон Мат Солеҳ, директори минтақавии бахши хусусии Бонки Рушди Исломӣ ҷаноби Аҳмад Абдул Халид ва сафири Тоҷикистон дар Малайзия Муҳаммадӣ ширкат карда дар мавриди муносибатҳои Тоҷикистон ва Малайзия, доир ба дурнамои ҳамкориҳои байни ду кишвар дар самтҳои иқтисод, тиҷорат, имтиёзҳо ҷиҳати соҳибкорӣ ва имкониятҳои сармоягузорӣ дар Тоҷикистон машварат кардаанд.
Коршиносони Вазорати рушди иқтисод ва савдо Сӯфиев, Кумитаи давлатии сармоягузорӣ ва идораи амволи амволи давлатӣ Кенҷаев ва муовини директори Департаменти Осиёи Марказӣ, Ҷанубӣ ва Ғарбӣ ва Африкаи Вазорати савдои байналмилалӣ ва саноати Малайзия Шариф муносибатҳои иқтисодӣ ва тиҷоратии Тоҷикистону Малайзия, имкониятҳои сармоягузорӣ ва фаъолияти минтақаҳои озоди иқтисодии Тоҷикистонро муаррифӣ кардаанд.
Манбаъ меафзояд, ки дар чорабинии мазкур намояндагони ВУХ, Вазорати тиҷорати байналмилалӣ ва саноати Малайзия ва намояндагони ширкатҳои бонуфуз, соҳибкорони маҳаллӣ ва теъдоди зиёди донишҷӯёни тоҷикистонӣ ширкат варзидаанд.
