ДУШАНБЕ, 27 окт — Sputnik. Кормандони Сафорати ҶТ дар Русия ва Намояндагии вазорати кор ва шуғли аҳолии Тоҷикистон дар Русия ба Маркази нигаҳдории муваққатии муҳоҷирон дар Сахарова рафтанд.
Дар рафти сафар намояндагони ҳукумати Тоҷикистон бо шароити нигаҳдории муҳоҷирони тоҷик дар боздоштгоҳ ошно шуда, бо мудири марказ Аликсей Лагодой мулоқот карданд.
"Дар рафти гуфтушунид бо мудири марказ масъалаи дуруст кардани ҳуҷҷатҳои муҳоҷирон ва интиқоли саривақтии онҳо ба Тоҷикистон баррасӣ шуд",- гуфта мешавад дар хабар.
Кормандони сафорат ҳамчунин бо ҳамватанонашон гуфтушунид карда, бо онҳо дар бораи қонунгузории Русия мулоқот анҷом доданд. Тоҷикони марказ хоҳишу дархостҳои худро ба намояндагони Ҳукумат пешниҳод карданд.
Пас аз ин кормандони Сафорати ҶТ дар Русия ба муҳоҷирони тоҷик маҳсулоту хӯрокворӣ аз ҷумла меваҷоти ватаниро тақсим карданд. Илова бар ин, онҳо ба бархе аз тоҷикон, барои омода кардани ҳуҷҷатҳои лозима кӯмак расониданд.
Пештар хабар дода шуд, ки дар Маскав арзиши патент 7 дарсад гарон мешавад.
