ДУШАНБЕ, 29 сен — Sputnik. Ба гузориши равобити умумии ВКД ҶТ, дирӯз дар доираи баргузории 86-умин Ассамблеяи Генералии Интерпол дар шаҳри Пекин вазири корҳои дохили Тоҷикистон бо сафири Тоҷикистон дар ин кишвар Давлатзода Парвиз дидор ва мулоқот кардааст.
"Зимни боздид Рамазон Раҳимзода бо ҳайъати кормандони сафорати ҳамсӯҳбат шуда, ба онҳо як зумра китоб бо забони тоҷикӣ тақдим намуд", — омадаст дар ахбарнома.
Тоҷикистон дар муносибатҳои байнидавлатӣ бо кишварҳои ҳаммарз ва минтақа сиёсати дӯстӣ ва ҳамсоягии некро ба роҳ мондааст.
"Дар муносибатҳо бо Ҷумҳурии Мардумии Чин солҳои охир намунаи хуби ҳамкориҳои созанда, самарабахш ва судманд арзи вуҷуд кардааст ва дар ин замина фазои фарохи рушду тавсеаи ҳамкориҳои тиҷоративу иқтисодӣ ва сармоягузорӣ фароҳам омадааст, ки ин ба нафъи суботу амнияти минтақа мебошад", — гуфтааст вазир.
Сафири Тоҷикистон дар Чин Давлатзода Парвиз ба вазири корҳои дохилӣ ҷиҳати ташриф ва дидорбинӣ аз сафорат ва ҳайати кормандон изҳори сипос намудааст.
