ДУШАНБЕ, 10 сен — Sputnik. Ҷашнвора дар шаҳри Стокголм баргузор мегардад. Филмҳои "Коса" ва "Духтари Сайҳун"-и коргардон Муҳиддини Музаффар дар фестивали мазкур дар радифи 30 филми дигар аз Эрон, Афғонистон ва дигар кишварҳои дунё, ки бо забони форсӣ — тоҷикӣ (дарӣ) ба навор гирифта шудаанд, пешкаши тамошобинон мешаванд.
Намоиш рӯзи 10- сентябр дар назар аст.
Мавзӯи филмҳои фестивал ин мушкилоти кӯдакону наврасон, муҳоҷират ва ҷангу сулҳ, масоили гуногуни иҷтимоӣ ва фарҳангӣ мебошад.
Боиси зикр аст, ки филми "Коса" дар бораи масъулияти падару модар дар тарбияи фарзанд нақл мекунад. Ин филм соли гузашта дар фестивалҳои синамоӣ дар шаҳри Қазони Федератсияи Россия ва Лондони Бритониёи Кабир намоиш дода шуда буд.
"Духтари сайҳун" оид ба зиндагӣ ва фаъолияти эҷодии Шоири халқии Тоҷикистон Фарзона ба навор гирифта шудааст.
