ДУШАНБЕ, 3 сен — Sputnik. Чандсад мусулмон дар назди сафорати Мянма дар Маскав алайҳи "қатли ом"-и мусулмонони Мянма ба эътироз баромаданд.
Ба гузориши манбаъи Sputnik Тоҷикистон, ҳамаи эътирозгарон мардони ҷавон ҳастанд. Муайян шуда, ки миёни тоҷикон ҳам ҳастанд. Эътирозгарон дар назди сафорат ҷамъ шуда бо шиорҳои "Мо зидди куштор" баромад мекунанд.
Шумораи эътирозгарон бештар мешаваду онҳо ҳатто роҳҳои худравгузарро пур кардаанд. Аксари мардум дар паи ба навор гирифтани иқдом буда, мақомоти пулиси Маскав кӯшиш дорад роҳи автомобилгузарро аз эътирозгарон холӣ кунад.
Ёдоварӣ мекунем, ки амалиёти артиши Мянма дар вилояти Ракҳайн рӯзи 25 август дар посух ба ҳамлаҳои чирикиҳо аз Артиши озодии Аракан (АРСА) ба 20 посгоҳи пулис оғоз ёфт. Ин амалиёт ба куштори чандин мардуми осоишта боис шуд. Гуфта шуд, ки беш аз 400 мусулмон дар ин амалиёт қатл шудааст.
Дар изҳороти артиши Мянма гуфта мешавад, ки дар паи баргузории 90 амалиёт, ки рӯзи 25 август оғоз шудааст, 370 ҷангҷӯй нобуд карда шуд.
Ҳукумати Мянма мардуми дигар эътиқодро ба ҷойҳои бехавф мекӯчонанд дар ҳоле, ки мусулмонони Роҳинҷа дар Бангладеш паноҳ меҷӯянд.
Чанде пеш раисҷумҳури Туркия, Раҷаб Тайиб Эрдуғон амалиёти Мянмаро "қатли оми мусулмонон" хонд.
"Онҳое, ки ба ин амалиёт чашм мепӯшанд ҳамдасти қатлкунандагон ҳастанд", — изҳор дошт Эрдуғон ҳангоми таҷлили Иди Қурбон.
