ДУШАНБЕ, 30 авг — Sputnik. Раҳматулло Зоиров, раҳбари Ҳизби сосиал-демократи Тоҷикистон бо нашри баёнияе дар шабакаҳои иҷтимоъӣ аз вазири маорифу илми ҶТ Нуриддин Саид хост Қонуни таътилоти расмии кишварро риоя ва иҷро кунад.
Раҳбари ҲСДТ дар ин баёния ёдоварӣ карда, ки "дар Ҷумҳурии Қазоқистон, ки рӯзи 1 сентябр иди Қурбон ҷашн гирифта мешавад ва аз ин рӯ рӯзи истироҳат эълон карда шудааст, рӯзи Дониш 2 сентябр баргузор мегардад".
Вай ҳамчунин ёдоварӣ карда, ки дар Русия низ бархе аз мактабҳо дар шаҳри Маскав ва дигар шаҳру ноҳияҳо ба далели ҷашн гирифтани иди Қурбон дар рӯзи 1 сентябр рӯзи Донишро 4 сентябр баргузор мекунанд.
Ӯ гуфта, ки беш аз 30 кишвар рӯзи Донишро ба далели иттифоқ афтодани иди Қурбон дар 1 сентябр, рӯзи Донишро ба дигар рӯз гузарондаанд.
"Аз ин рӯ, аз Шумо эҳтиромона хоҳиш мекунам Қонуни Ҷумҳурии Тоҷикистон "Дар бораи рӯзҳои ид ва истироҳат"-ро риоя ва иҷро кунед", — дархост кардааст Раҳматулло Зоиров аз Нуриддин Саид.
Пеш аз ин ҳам раҳбари ҲСДТ вазорати маорифу илмро муттаҳам ба нақзи Қонуни асосӣ ва Қонуни таътилоти расмии ҶТ карда буд.
