ДУШАНБЕ, 23 авг — Sputnik. Бунёди "Ҷаҳони русӣ" дар Тоҷикистон дар гузорише эълом кардааст, ки Русия то оғози соли нави хониш камобеш 70 ҳазор китоби дарсӣ дар ихтиёри мактабҳои русизабони Тоҷикистон қарор медиҳад.
Ба гуфтаи мудири Идораи барномаҳои омӯзишии Бунёди "Ҷаҳони русӣ" Виктор Буянов, ин созмон бо дастури раиси маҷлиси Шурои федеросюни Русия Валентина Матвиенко 20 тон китобу донишафзорро ба Тоҷикистон хоҳад бурд.
Ин китобҳо барои омӯзиши забону адабиёти русӣ, риёзӣ, физика, зистшиносӣ, химия, информатика дар дигар риштаҳо дар ихтиёри мактбаҳои русизабон қарор дода хоҳанд шуд.
Китобҳоро ба мактабҳо Вазорати маорифу илми Тоҷикистон тақсим хоҳад кард.
Афзун бар ин китобҳо, то оғози соли нави хониш 30 омӯзгори забони русӣ, химия, физика, риёзиёт, зистшиносӣ ва роёна (информатика) аз манотиқи гуногуни Русия барои донишомӯзӣ ба шогирдони мактабҳои русии Тоҷикистон ба кишвар фиристода хоҳанд шуд.
