ДУШАНБЕ, 2 май — Sputnik. Вазирони умури хориҷаи кишварҳои Осиёи Марказӣ ва Ҷопон натиҷаҳои раёсати Туркманистонро дар ин чорчӯби гуфтугӯи "Осиёи Марказӣ+Ҷопон" баррасӣ намуда, самтҳои нави ҳамкориҳои минтақаиро мушаххас карданд.
Бино ба иттилоъи равобити умумии вазорати умури хориҷаи ҶТ, Сироҷиддин Аслов дар суханронии худ дар ин нишаст бар аҳамияти тавсеъаи ҳамкориҳои созандаи дуҷониба ва минтақаӣ ва зарурати истифодаи густурда аз иқтидори кишварҳои Гуфтугӯкунанда ҷиҳати таҳкими робитаҳо дар заминаҳои иқтисоду тиҷорат, энержӣ, кишоварзӣ, фарҳангиву башарӣ, таробарӣ ва дигар соҳаҳоро унсурҳои калидӣ хонд.
"Аслов дохил кардани масъалаҳои мубориза бо теруризм, пешгирӣ аз қочоқи маводи мухаддир ва мусоидат ба рушди оромии Афғонистонпро ба рӯзномаи Гуфтугӯ пешниҳод кард", — омадааст дар хабаре, ВУХ ҶТ мунташир кардааст.
Дар паи нишасти вазирони корҳои хориҷа дар чорчӯби Гуфтугӯи "Осиёи Марказӣ+Япония" Баёнияи муштарак ба имзо расид ва Нақшаи роҳ барои ҳамкории минтақаӣ дар заминаҳои таробарӣ ва лоҷистик тасвиб карда шуд.
Ҳамчунин қарор шудааст, ки дар солҳои 2017-2018 Тоҷикистон раёсати ин Гуфтугӯро ба уҳда дошта бошад. Ҳафтумин нишасти вазирони корҳои хориҷаи кишварҳои Осиёи Марказӣ ва Ҷопон низ дар Душанбе баргузор хоҳад шуд.
Мулоқоти Аслов бо вазири Ҷопон ва Туркманистон
Бино ба иттилои манбаъ, дар дидори Аслов ва Фумио Кисида густариши муносибатҳои Тоҷикистон ва Ҷопон баррасӣ шуд.
"Сироҷиддин Аслов ва Фумио Кисида алоқамандии мутақобилро ҷиҳати таҳкиму тавсеаи ҳамкориҳои амалии ду кишвар дар соҳаҳои тиҷоратию иқтисодӣ, сармоягузорӣ, нақлиётӣ, саноатӣ, энергетикӣ ва фарҳангию башарӣ баён намуданд".
Дар суҳбат бо Рашид Муродов, вазири умури хориҷаи Туркманистон ҷонибҳо ҳолат ва дурнамои густариши муносибатҳои ду кишвар дар арсаҳои сиёсӣ, иқтисодӣ, тиҷоратӣ, энергетикӣ, нақлиётӣ ва фарҳангию башариро ба баррасӣ гирифтаанд.
