ДУШАНБЕ, 15 апр — Sputnik. "Ишқи парӣ" ба қалами нависанда ва драматург Тоҳири Маҳмадризо тааллуқ дошта, он дар таҳияи сеюм аз ҷониби коргардони шинохта Умар Алиев рӯи саҳна оварда шуд. Намоиш аз ишқи поки инсонӣ ва вафо кардан ба ваъда нақл мекунад.
Ба гузориши пойгоҳи иттилоърасонии Вазорати фарҳанги Тоҷикистон, ин намоишномаро нахустин бор соли 2008 дар Театри давлатии драмаи русии ба номи Владимир Маяковский Ҳунарпешаи халқии Тоҷикистон Баҳодур Миралибеков ба саҳна гузошта буд.
Соли 2012 дар Театри мусиқӣ-драмавии ба номи Меҳрубон Назаров дар шаҳри Хоруғ дар таҳияи коргардон Умед Хисравов манзури ҳаводорони театр гардид.
Намоиши "Ишқи парӣ" дар чандин озмуну ҷашнвораҳои байналмилалӣ дар Украина, Белорус, Қирғизистон, Қазоқистон, Ӯзбекистон ва Россия ширкат варзида, соҳиби тӯҳфа ва дипломҳои гуногун гардидааст. Инчунин соли 2011 дар Фестивал-озмуни ҷумҳуриявии театрҳои касбӣ "Парасту-2011" ҷои аввалро соҳиб шуда буд.
Ҳикояи "Ишқи парӣ" соли 1994 бори нахуст дар рӯзномаи "Нидои ранҷбар" нашр гашта буд. Соли 2006 бо дархости коргардон Баҳодур Миралибеков ба шакли пйеса таълиф гардидааст.
