ДУШАНБЕ, 9 апр — Sputnik. Сафири фавқулода ва мухтори Ҷумҳурии Тоҷикистон дар Токио Ҳамрохон Зарифӣ бо мудири кулли равобити байнулмилалии Вазорати омӯзиш, фарҳанг, варзиш, илм ва фанноварии Ҷопон Казуаки Кавабата мулоқот кард.
Бино ба гузориши хадамоти иттилоъотии Вазорати умури хориҷаи ҶТ, дар ин мулоқот, ки 7 апрел баргузор шуда, масоъили ҳамкориҳои ду кишвар дар заминаҳои омӯзиш, илму фанноварӣ, фарҳанг ва варзиш баррасӣ шуданд. Ҳамрохон Зарифӣ ва Казуаки Кавабата бар афзоиши бурсияҳои таҳсилии Ҳукумати Ҷопон барои Тоҷикистон ва тавсеъаи ҳамкорӣ дар заминаи табодули таҷрубаҳои варзишӣ таъкид карданд.
Дар ин мулоқот тарафайн ба манзури тақвияти равобити ду кишвар якчанд пешниҳоди мушаххас, аз ҷумла, баргузории нахустин нишасти Комисюни муштараки ҳамкориҳои иқтисодӣ, фаннӣ ва илмии Тоҷикистону Ҷопонро ҳамоҳанг карданд.
