ДУШАНБЕ, 2 фев — Sputnik."Тоҷиккристалл" бори дигар маросими супоридани ҷоизаи "Сарояндаи маҳбубтарини сол"-ро баргузор кард. Ин дафъа унвони "Ситораҳои тиллоӣ" насиби Нигина Амонқулова гардид.
Чуноне ки худи овозхон ба Sputnik Тоҷикистон хабар дод, ҷоизаро ба вай директори ширкати "Тоҷиккристалл" Умед Абдураҳмонов супоридааст.
"Ростӣ, ман хабар надоштам, ки ба ман "Тоҷиккристалл" ҷоиза омода намудааст, бароям маросими имрӯза ногаҳонӣ гашт",- мегӯяд ҳунарманд.
Ба гуфтаи вай, "Тоҷиккристалл" тариқи шабакаи Viber озмун эълон кардааст, ки дар натиҷа дар ҷойи аввал Нигина Амонқулова қарор гиритфтааст.
"Албатта, аз гирифтани диплом бо унвони сарояндаи маҳбубтарини сол ман хело шод гаштам. Барои сароянда қадрдонӣ кардани ҳунараш ин худ як ҷоизаи беҳтарин ба ҳисоб меравад",- мегӯяд Нигинабону.
Ёдовар мешавем, ки пештар Шабнами Сурайё, Ҷонибеки Мурод ва Манижаи Давлат низ ба гирифтани ин ҷоиза аз ҷониби "Тоҷиккристалл " сазовор дониста шуда буданд.
Ба иттилои Беҳрӯз Зеваров дар маросими ҷоизасупорӣ Шабнам ва Ҷонибек ҳозир шуда, Манижаи Давлат дар хориҷ қарор доштааст.
Нигина Амонқулова дар бораи нақшаҳои ҳунариаш низ дар соли 2017 ба Sputnik хабар дод.
Ин овозхон, ки тавонистааст, аллакай дар соли нав як клипи худро бо номи "Муҳаббати мурда аз ҷафо" тақдим кунад, мехоҳад дар давоми сол якчанд сабти дигар ба ҳаводоронаш пешниҳод намояд.
"Худи ҳамин моҳ дар пайи сабти клипи "Дили беқарор" гаштаем ва ба зуддӣ мехоҳем пешкаши мухлисон гардонем",- мегӯяд вай.
Мухлисонамро дар ояндаи наздик бо сурудҳои нав шод мекунам, илова намуд Нигина Амонқулова дар сӯҳбати кӯтоҳ бо Spurnik Тоҷикистон.
