Ба қавли ӯ ин иншооти беназир буда, дар ҷаҳон ягона аст.
-Барои чӣ ИҶШС сохтмони Роғунро ба охир нарасонид?
— Нерӯгоҳи барқи обии Роғун иншооти бузурги гидроэнергетикӣ мебошад, ки сохтмони он дар сурати маблағгузории зарурӣ аз 5 то 8-солро талаб мекунад.
То соли 1991-ум сохтмони ин иншоот ба охир нарасида буд. Аз соли 1992-юм бошад, вазъияти Тоҷикистон барои ба итмом расонидани сохтмони бузург имкон надод.
-Мушкилоти асосии сохтмони нерӯгоҳи Роғун дар чӣ аст?
— Мушкилоти сохтмони нерӯгоҳ нишондиҳандаҳои сохторӣ ва мураккабии шароити табиии истоҳ мебошад.
Нерӯгоҳ сарбанди баландиаш 335 метр бо ҳаҷми 70 млн м³-ро дар бар мегирад, ки мувофиқи чунин нишондод, бузургтарин иншооти ҷаҳонӣ ба ҳисоб меравад.
Ин комплекси бузурги энергетикӣ бо иншооти зеризаминӣ мебошад. Иншоот дар шароити табиӣ, бо хусусиятҳои мушкили муҳандисӣ, геологӣ ва хатари баланди заминҷунбӣ сохта мешавад.
-Вақтҳои охир дар бораи хатари сохтмони Роғун ба кишварҳои ҳамсоя ва вазъи оби онҳо зиёд гуфта мешавад. Оё ин ҳақиқат дорад?
— Бояд дарк кард, ки ташаббуси ҳукумати Тоҷикистон оиди сохтмони Роғун аз ҷониби коршиносони Бонки ҷаҳонӣ дар доираи барномаи Ташхиси байналмиллалӣ, санҷида шуд.
Натиҷаҳои ташхис сохтмони нерӯгоҳи Роғунро ҳам аз ҷиҳати шароити сохтмонӣ ва ҳам аз ҷиҳати таъсири он ба вазъи оби Вахш ва Амударё имконпазир хонд.
