ДУШАНБЕ, 7 окт — Sputnik.Ошпазони вилояти Суғдро раиси вилоят ва адибону фаъолони минтақаъ пешвоз гирифтанд. Барои иштирокчиён — ошпазҳои беҳтарин диплому мукофотпулиҳо тақдим шуд.
"Ба иштирокчиёни беҳтарини Фестивали "Оши палав" аз рӯи бахшҳои "Оши палави беҳтарин" — 5000 сомонӣ (ғолиби бахш Хайём Бобомуродов аз Панҷакент), "Ошпази касбии беҳтарин" — 3 000 сомонӣ (ғолиби бахш Раҳимов Мирзобарот аз Хуҷанд), "Ошпази беҳтарин байни муйсафедон" — 1000 сомонӣ (ғолиби бахш Холиқов Зикриё аз Исфара), диплому мукофотпулиҳо супорида шуд",- хабар медиҳад хадамоти матбуоти Мақомоти иҷроияи ҳокимияти давлатии вилояти Суғд.
Дар Маҷмаа дастурхони идона ороста шуд ва беш аз 4000 нафар сокинон ва иштирокдорони зиёди фестивал ба таври ройгон аз Оши палави омодакардаи ошпазҳои моҳири шаҳру ноҳияҳои вилоят тановул намуданд, менависад манбаъ.
Фестивали "Оши палав" соли дуюм аст, ки дар вилояти Суғд баргузор мешавад.
Оши палов ё худ палав — таоми миллии тоҷикон ба ҳисоб рафта, он аз қадимулайём хӯроки дӯстдоштаи мардуми тоҷик мебошад. Имрўз дар минтақаҳои гуногуни вилояти Суғд, аз ҷумла шаҳри Хуҷанд чанд намуди паловпазӣ маълум аст.
