ДУШАНБЕ, 5 авг — Sputnik. Вазорати умури дохилии Ҷумҳурии Тоҷикистон дар бораи ҳодисаи нохуши табиӣ дар шоҳроҳи Бартанг-Рушон хабар медиҳад.
Бино ба иттилои манбаъ рӯзи 3 август тахминан соати 21:00-дақиқа, автомашинаи тамғаи "Уаз-469", таҳти идораи ронанда, марди 28-солаи сокини ноҳияи Рӯшон, ки аз самти деҳаи Бардара ба самти маркази ноҳияи мазкур ҳаракат мекард, дар мавзеи Бадрудӣ аз болои кӯҳ сангпораҳо афтида, ба болои автомашина задааст.
Дар пайи сангрезӣ автомашинаи мазкур аз роҳи мошингард ба даруни дарёи Бартанг чаппа шуда, дар об ғарқ шудааст.
"Дар натиҷа мусофирони дохили автомашина се нафар ҷавони 19 ва 20-солаи сокинони ноҳияи Рӯшон ҷароҳатҳои гуногуни ҷисмонӣ бардошта, дар беморхона бистарӣ гардида, мусофирони дигари автомашина марди 26 ва 29-солаи сокинони ҳамин ноҳия дар дарё ғарқ шуда, ба ҳалокат расидаанд",-омадааст адр хабарнома.
