ДУШАНБЕ, 10 мар — Sputnik. Феълан дар ихтиёри шабакаи бритониёии "Sky News" иттилоъ дар бораи даҳҳо ҳазор ҷангии "Давлати Исломӣ" қарор гирифтаст.
Шабакаи "Sky News" мегӯяд, санадҳоеро, ки маълумоти шахсии даҳҳо ҳазор ҷангиро дар бар мегирад, пайдо кардааст. Ҳуҷҷатҳоро дар флешка ба ин шабака як ҷангӣ додааст.
Сухан дар бораи даҳҳо ҳазор ҳуҷҷат бо номҳо, суроға ва рақамҳои телефонии 22 ҳазор террористон меравад.
Дар қатори ҷангиён, шаҳрвандони беш аз 51 кишвари ҷаҳон қарор доранд, ки ҳар яки онҳо ҳангоми ба гурӯҳ шомил шудан, маълумоти пурра бар бораи худ бо ҷавоб додан ба 23 савол пешниҳод менамуданд.
"Давлати исломӣ", ё ба истилоҳ "ДИИШ" дар ҳоли ҳозир аз бузургтарин хатар ба амнияти ҷаҳонӣ ба шумор меравад.
Тайи се сол ҷангиёни ин гуруҳ қисме аз сарзаминҳои Ироқу Сурияро ғасб карда, таҳти назорат гирифтанд. Дар баробари ин, онҳо кӯшиш доранд, то таъсири худро дар мамлакатҳои Африқои Шимолӣ ва махсусан дар Либиё мустаҳкам намоянд.
Бино ба маълумоти мақомотҳои гуногун ҳудуди минтақаҳое, ки аз ҷониби "Давлати исломӣ" идора мешаванд, то ба 90 ҳазор километри мураббаъ мерасад.
Теъдоди тахминии ҷангиёни ин созмон аз 50 то 200 ҳазор нафар гуфта мешавад.
