ДУШАНБЕ, 8 дек — Sputnik. Нахуствазири Федератсияи Русия Дмитрий Медведев муҳлати баррасии масъалаи марбут ба эътирофи мақоми низомиёни русро дар Сурия то 10 декабр ихтисор кард, иттилоъ медиҳад сомонаи расмии ҳукумати ин кишвар.
"Вазорати мудофиаи Русия, вазорати меҳнат, вазорати саноату савдо ва вазорати молияро зарур аст, ки масъалаи ворид кардани тағйиру иловаҳоро ба қонунгузории ФР дар мавриди додани мақоми собиқадори ҷанг ба шаҳрвандони Русия, ки ба Ҷумҳурии арабии Сурия барои анҷоми вазифа фиристода шудаанд, то рӯзи 10 декабр баррасӣ намоянд",- омадааст дар иттилоъия.
Қаблан, раисҷумҳури Русия Владимир Путин ин масъаларо барои баррасӣ ба ҳукумат пешниҳод карда, то 20 декабр муҳлат дода буд. Ин супориш 1 октябр, пас аз баргузории ҷаласаи шӯрои назди президент оид ба рушди ҷомеъаи шаҳрвандӣ ироа шуд.
Маврид ба ёдоварист, неруҳои ҳавоии Русия баъд аз муроҷиати расмии Димишқ дар охири моҳи сентябри соли равон ба Сурия сафарбар шуданд. Дар номаи раисҷумҳури Сурия Башшор Асад аз Владимир Путин дархост шуда буд, ки ба хотири мубориза бо терроризм неруҳои ҳавоии Русия ба ин кишвар сафарбар шаванд.
