ДУШАНБЕ, 13 ноя — Sputnik. Аз 16 ноябри соли равон дарсҳои басти якум дар муассисаҳои касбии миёна ва олии шаҳри Душанбе аз соати 7:30 оғоз хоҳанд шуд, гуфт сухангӯи Вазорати маориф Эҳсон Хушвахтов дар суҳбат бо хабарнигори Sputnik.
Ба қавли манбаъ, ин тасмим бо пешниҳоди шаҳрдории Душанбе дар мувофиқа бо ҳукумати кишвар ва Вазорати илму маориф бо мақсади барқарор кардани ҳаракати мусоиди нақлиёт ва ҷилавгирӣ аз тамбашавӣ дар роҳҳои пойтахт сурат гирифтааст.
Қаблан дарсҳои донишҷӯён дар макотиби олӣ ва миёнаи махсуси пойтахт аз соати 8:00 шурӯъ мешуд, ҳоло бошад вақти оғози таълим 30 дақиқа барвақттар муайян гардид.
Айни замон дар ҷумҳурӣ 35 муассисаи таҳсилоти олӣ фаъолият дошта, бештар аз 120 ҳазор донишҷӯ дар онҳо таҳсил менамоянд. Аксари донишгоҳҳои кишвар дар шаҳри Душанбе воқеъ мебошанд.
Дар басти якуми муассисаҳои олӣ касбии шаҳри Душанбе 48,172, дар басти дуюм 36,715, инчунин дар колеҷу омӯзишгоҳҳо бошад дар басти якум 8821 дар басти дуюм 4114 донишҷӯ таҳсил мекунанд.
