ДУШАНБЕ, 29 июл — Sputnik. Душанбе ва Бишкек музокирот барои таъйин ва таъйиди хутути марзи муштаракро идома медиҳад, хабар дод ахиран вазири корҳои хориҷии Тоҷикистон Сироҷиддин Аслов дар нишасти матбуотӣ дар Душанбе, менависад хабаргузории Авеста.
"Ҷонибҳо нақшаи корӣ дорад ва тибқи он ҷонибҳо куллияи масоили марбут ба ин мавзӯъро баррасӣ мекунанд. Ҳудуди 50% хати марз таъйид шудааст ва умури таъйини қисмати боқимондаи марз идома дорад", — зикр кард вай.
Аслов ҳамчунин хабар дод, ки умури таъйин ва аломатгузории марз бо Ӯзбакистон низ идома дорад.
"Бо Ӯзбекистон 90% хутути марз таъйид шуда таъйини 10% боқӣ мондааст", — гуфт вазир.
Раҳбари ВКХ Тоҷикистон изофа кард, ки мавзӯъи марзи Тоҷикистону Афғонистон ҳалл шуда танҳо аломатгузории он боқӣ мондааст. "Марз аз рӯйи рӯдхонаи Панҷ мегузарад ва маҷрои он пайваста тағйир ёфта соҳилҳои ҳар ду тарафи марзро мешӯяд. Ба ин далел дар ин марз аломатгузорӣ зарур аст", — зикр кард вай.
