ДУШАНБЕ, 24 июл — Sputnik. Ҳудуди 65 дарсади шаҳрвандони синнашон аз 100-сола болоро дар Тоҷикистон занон ташкил медиҳанд, бо такя ба Гулнора Ҳасанзода, раиси Агентии омори кишвар навиштааст хабаргузории "Озодагон".
Ҳасанзода, 24-уми июл зимни нишасти матбуотӣ дар Душанбе гуфтааст, дар маҷмӯъ дар кишвар 306 нафар афроди 100-сола ё аз 100-сола боло зиндагӣ мекунанд, ки аз онҳо 109 нафарашон мард ва 197 нафар зан мебошад.
Дар маҷмуъ, ба иттилои Агентии омор, тибқи ҳисобҳои соли 2014 аҳолии кишвар наздики 8,5 миллион нафарро ташкил медиҳад, ки аз ин 603 ҳазорашон нафақахӯр мебошанд. Ин ниҳод ҳаҷми миёнаи бознишастагиро дар кишвар 230 сомонию 14 дирам арзёбӣ кард.
