ДУШАНБЕ, 3 июл — Sputnik. Ба далели хуруҷи бемории сироятии MERS дар Куриёи Ҷанубӣ аз сафари 67 варзишгари тоҷик барои иштирок дар Универсиадаи тобистона, ки рӯзҳои 3 то 14 июл баргузор мешавад, ҷилавгирӣ шудааст, иттилоъ медиҳад Радиои Озодӣ.
Ҳукумати Тоҷикистон аз миёни 73 варзишгар сафари 67 нафарро лағв кардааст. Мақомоти Тоҷикистон мегӯянд, лағви сафари бархе аз варзишгарон ба хуруҷи бемории "Мерс" дар Кореяи Ҷанубӣ рабт дорад, менависад Озодӣ.
Аммо хабаргузории мустақили Yonhap-и Кореяи Ҷанубӣ рӯзи ҷумъа навишт, ки то шурӯи сафари варзишгарони тоҷик ба Куриёи Ҷанубӣ 6 хориҷӣ бо паспортҳои ҷаълӣ ё қалбакӣ, ки ба номи варзишгарони тоҷик таҳия шудаанд, ошкор шуданд.
Аз ин 6 нафар — 3 нафар дафъатан ихроҷ шуда, ҷои будубоши се нафари дигар маълум нест. Ҷониби Тоҷикистон гуфтааст, ки масъулияти ин ҳодисаро ба дӯш мегирад ва онро мавриди таҳқиқ қарор медиҳад.
