ДУШАНБЕ, 5 мар — Sputnik. "Давлати исломӣ" талош дорад, ки мероси таърихӣ ва фарҳанги тамаддуни исломиро маҳв созад, изҳор дошт раиси ҷумҳури Туркия Раҷаб Тайиб Эрдуғон зимни шарҳи оташсӯзии китобхона дар шаҳри Мосули Ироқ аз сӯйи ҷангиёни ДИ, хабар медиҳад РИА Новости.
Дар ҳафтаи гузашта ҷангиёни ДИ бинои китобхонаи марказии Генам-ат-Таан дар шаҳри Мосулро мунфаҷир сохтанд. Онҳо аз китобҳое, ки мероси фарҳангии Ироқ дониста мешаванд гулхан афрӯхтанд. Ҳазорҳо китоб, ки дар миёни онҳо китобҳои нодир дар бахши фарҳанг, фалсафа, таърих ва садҳо дастхатҳо буданд, нобуд шуданд.
Эрдуғон аъмоли ДИ ҳамтои маҳви китобхона дар Бағдод ба ҳангоми забти ин шаҳр аз сӯйи муғулҳо дар асри ХIII ва оташсӯзии китобхонаи нодир дар Тимбукту дар Малӣ дар моҳи январи соли 2013 аз сӯйи тундгароёни исломӣ донист.
"Ҳоло созмони террористӣ, ки дар Сурия ва Ироқ фаъолият мекунад, аз ҳамин роҳ рафта талош дорад, ки фарҳанг ва решаҳои тамаддуни моро маҳв созад. Мутаассифона, китобхонаи Мосулро, ки дар он ҳудуди 8 ҳазор адад китоби нодир ҳифз мешуданд, аъзои ин созмон оташ заданд", — изҳор дошт Эрдуғон рӯзи чаҳоршанбе дар Истамбул зимни ифтитоҳи намоишгоҳи фарҳанги қадимӣ.
