ДУШАНБЕ, 25 фев — Sputnik. Беш аз 50 нафар дар пайи резиши баҳман (тарма) дар вилояти Панҷшер дар шимолу шарқи Афғонистон нопадид шудаанд, хабар медиҳад Khaama Press бо истинод ба мақомоти маҳаллӣ.
Омори дақиқи осебдидагон рӯшан нест, вале эҳтимолан беш аз 20 нафар кушта шуда ва ҳудуди 30 нафари дигар зери қабати барф мондаанд.
Шонздаҳ ҷасад аз зери қабати барф берун кашида шудаанд.
Волии вилоят Абдул Раҳмон Кабирӣ гуфт, ки чанд манзили маскунӣ низ осеб дидаанд.
Панҷшер яке аз сиву чаҳор вилояти Афғонистон аст, ки 144,4 ҳазор ҷамъият дорад. Шаҳри Бозорак маркази маъмурии ин вилоят мебошад.
Дар Тоҷикистон низ барфрезии шадид қурбониҳое ба дунбол дошт.
Рӯзи якшанбеи гузашта дар ҷоддаи мошингарди Душанбе-Хуҷанд дар пайи резиши баҳман се нафар кушта шуданд.
Рӯзи сешанбе низ дар ин маҳал тарма болои мошини "Газел" фаромад ва дар натиҷа як нафар кушта шуд.
Барои таъмини амният дар ҷумҳурӣ дар ҳаракати васоили нақлия дар ҷоддаи Душанбе-Хуҷанд маҳдудияти шабона роҳандозӣ шуд.
