ДУШАНБЕ, 26 фев – Sputnik. Сафири Тоҷикистон дар Русия Давлатшоҳ Гулмаҳмадзода дар мулоқот бо ҷамъиятҳои тоҷикони Уфа, донишҷӯён ва шаҳрвандони ҷумҳурӣ ба риояи қонунҳои Русия даъват кард.
Дар ин бора хадамоти матбуоти Шӯрои ҷамъиятии назди сафорати Тоҷикистон хабар дод.
Сафир қайд кард, ки шаҳрвандони Тоҷикистон, ки дар Русия кор мекунанд, бояд қонунгузории амалкунандаро бо назардошти ҳама тағйирот риоя кунанд.
Дар мулоқот инчунин ба зарурати мубориза бо экстремизм ва терроризм, инчунин пешгирии қочоқи маводи мухаддир таъкид шуд.
Гулмаҳмадзода аз роҳбарони созмонҳои ҷамъиятӣ даъват кард, ки чорабиниҳои фарҳангиро барои таблиғи ҳувияти миллӣ баргузор кунанд.
Ғайр аз ин, сафир ба аҳамияти нигоҳ доштани тамосҳои мунтазам байни роҳбарони ҷамъиятҳо ва ҳамватанон, ки омили калидӣ дар барқарор кардани робитаҳои байналмилалӣ мебошад, таъкид кард.
Оқои Гулмаҳмадзода афзуд, ки президенти Тоҷикистон Эмомалӣ Раҳмон ба маориф ва тайёр кардани кадрҳои баландихтисос таваҷҷуҳи зиёд зоҳир мекунад.
Дар поёни мулоқот ҳамватанон аз Гулмаҳмадзода дар бораи ҳуҷҷатҳои зарурӣ барои будубош дар Русия пурсон шуданд.
Ёдовар мешавем, ки қаблан сафири кишвар консули нави генералии Тоҷикистон дар Уфа Фаридун Файзуллозодаро ба раиси Бошқирдистон Радий Хабиров муаррифӣ кард.