ДУШАНБЕ, 19 фев - Sputnik. Кумитаи дин ва танзими анъанаи Тоҷикистон сарусадоҳо дар бораи манъ ё маҳдуд шудани маъракаи ифторро дар кишвар рад карда гуфтааст, ки ин "хабару овозаҳо асоси воқеӣ надоранд".
“Вобаста ба хабарҳои паҳншуда дар мавриди манъ ё маҳдуд гардидани баргузории маъракаи ифтор иттилоъ медиҳад, ки хабару овозаҳои мазкур асоси воқеӣ надоранд”, қайд кардааст Кумита.
Ин ниҳоди давлатӣ дар вокунишаш таъкид кардааст, ки маъракаи ифтор дар доираи талаботи Қонуни Тоҷикистон “Дар бораи танзими ҷашну маросим” маҳдуд нагардидааст.
Кумита аз сокинон даъват кардааст, ки зимни баргузории маъракаи ифтор низ бо риояи эътидол ба исрофу зиёдаравӣ роҳ надиҳанд.
“Ҳамватанони мо метавонанд ба ҷои густурдани хони бодабдаба таом ё дигар маводи ғизоиро ба ниёзмандон ва ҳамсояҳо фиристода, ба ин васила аз аҷру савоби бештаре бархӯрдор гарданд”, - қайд кардааст Кумитаи дин.
Кумита тавсияи додааст, ки дар рӯзҳои моҳи шарифи Рамазон сокинон ба анҷом додани садақаи ҷория, аёдати беморон, дастгирии ниёзмандон ва дигар корҳои хайр таваҷҷуҳ кунанд.
Дар Тоҷикистон ва дигар кишварҳои мусалмоннишин афроди доро дар моҳи Рамазон маъракаи ифтор гузаронда, ба шахсони рӯзадор ғизо медиҳанд.
Моҳи Рамазон имсол дар Тоҷикистон 19-уми феврал фаро расида, то20 март идома мекунад.