Ба ин мақсад феълан насби симчубҳо ва пайвастсозии хатти нахи нурӣ дар ҳудуди ноҳияҳои Шамсиддин Шоҳин ва Дарвоз идома дорад.
Кашидани хатти нахи нурӣ то марзи Чин дар доираи Лоиҳаи сохтмони шабакаи нақлиётии магистралии баландсуръат дар самти “Душанбе-Кӯлоб-Дарвоз-Рӯшон-Хоруғ-Қулма” сурат мегирад.
Тибқи лоиҳа дар марҳилаи аввал то ноҳияи Дарвоз дар масофаи 182 киллометр симчубҳои алоҳида насб гардида, дар қитъаҳои дигар ба воситаи симчубҳои неруи барқ хатти нахи нурӣ кашида мешавад.
Муовини аввали мудири "Тоҷиктелеком” Бахтовар Абдусатторов дар суҳбат бо Sputnik Тоҷикистон гуфт, корҳои пайвастсозӣ то охири соли равон ба маркази ноҳияи Дарвоз расонида мешавад.
Пас аз итмоми марҳилаи аввал ба воситаи ин хатти нахи нурӣ интиқоли интернет аз Душанбе ба Дарвоз шуруъ шуда, барои бештар намудани трафики интернет ва устувории канали захиравӣ хизмат хоҳад кард.
Марҳилаи дуюм аз аввали соли 2026 шуруъ шуда, дар назар аст, ки то охири сол ба сарҳади Тоҷикистону Чин расонида мешавад.
Ҳадафи он пайвастшавии мустақими шабакаҳои телекоммуникатсионии Ҷумҳурии Тоҷикистон бо шабакаҳои телекоммуникатсионии Чин мебошад.
Ин пайвастшавӣ барои паст намудани арзиш ва баланд бурдани суръати интернет дар кишвар муосидат хоҳад кард.