ДУШАНБЕ, 20 июн — Sputnik. Тоҷикистон бо дастоварди бузург Қаҳрамонии ҷудои ҷаҳонро ҷамъбаст кард. Ҷудокорони тоҷик таърихсозӣ карда, ба хазинаи варзишии кишвар аз ин мусобиқаи баланд якбора се медал оварданд.
Акнун ба ду медали биринҷӣ, ки Расул Боқиев дар соли 2007 ва Сомон Маҳмадбеков дар соли 2024 гирифта буданд, боз як медали нуқра ва ду биринҷӣ зам шуд.
Барандагони нишонҳои нави Қаҳрамонии ҷудои ҷаҳон Эмомалӣ Нуралӣ, Обид Ҷебов ва Темур Раҳимов мебошанд.
Бояд гуфт, аввалин медали нуқраро дар таърихи ҷудои тоҷик Эмомалӣ Нуралӣ соҳиб шуд.
Ҳамин тариқ, Тоҷикистон аз ҳисоби медалҳо: 1 нуқра ва 2 биринҷӣ дар Қаҳрамонии ҷудои ҷаҳон миёни 93 кишвари иштирокчӣ мақоми 7-умро касб намуд.
Ҷопон бо 14 медал мақоми аввал, Федератсияи ҷаҳонии ҷудо бо 5 медал дуюм ва Италия бо 2 медал, ки ҳардуяш тилоянд сеюм шуданд.
Дар ҳамин ҳол, интизор меравад, шаби 20 ба 21 июн варзишгарони тоҷик бо дастовардҳои таърихӣ аз Қаҳрамонии ҷудои ҷаҳон тариқи хатсайри Будапешт - Истамбул -Душанбе ба Тоҷикистон бармегарданд.