Нахустин Чемпионати ҷаҳон дар риштаи гӯштингирӣ дар Душанбе чӣ гуна анҷом ёфт?

Аз 28 то 31 август дар пойтахти Тоҷикистон – шаҳри Душанбе нахустин Чемпионати ҷаҳон дар риштаи гӯштингирӣ баргузор гардид.
Sputnik
ДУШАНБЕ, 1 сен — Sputnik. Дар Нахустин Чемпионати ҷаҳон дар риштаи гӯштингирӣ варзишгарон аз 63 давлати ҷаҳон иштирок намуданд.
Бояд гуфт, ки 29 августи соли равон бо иштироки намояндагони 62 кишвари ҷаҳон Президенти Тоҷикистон Эмомалӣ Раҳмон якдилона Президенти ифтихории Федератсияи байналмилалии гӯштингирӣ интихоб гардид.
Дар рӯзи якуми нахустин Чемпионати ҷаҳон оид ба гӯштингирӣ паҳлавонон аз рӯи 4 вазн- то 65, 70, 71 кг ва ҷамъи 95 қувваозмоӣ намуданд.
Дар вазнҳои то 65, 71 ва ҷамъи 95 кг гурӯҳи мардона варзишгарони тоҷик — Муллораҷаб Халифаев, Масъуди Аҳмадзод ва Шакармамад Мирмамадов пирӯзӣ ба даст оварда, нахустин чемпионҳои ҷаҳон оид ба гӯштингирӣ шуданд.
Дар вазни то 70 кг байни духтарон варзишгари Ҷумҳурии Узбекистон Гулноза Матниёзова чемпиони ҷаҳон ва Шоҳида Қаландарова соҳиби ҷойи дуюм ва медали нуқраи нахустин Чемпионати ҷаҳон оид ба гӯштингирӣ гардиданд.
Раҳмон: Гӯштингирӣ варзиши суннатии тоҷикон аст ва таърихи беш аз панҷҳазорсола дорад
Дар маҷмӯъ дар ин мусобиқаи байналмилалӣ паҳлавонони тоҷик соҳиби 5 медали тилло 1 нуқра ва 5 медили биринҷӣ шуданд.
Муллораҷаб Халифаев (65 кг) - тилло,
Шаҳбоз Саидабуроров (65) - баринҷӣ
Масъуди Аҳмадзод (71 кг) - тилло
Мирзоҷамил Рамазонов (71 кг) - биринҷӣ
Шоҳида Қаландарова (70 кг ) - нуқра
Шакармамад Мирмамадов (95 кг) - тилло
Қоим Шукронов (78 кг) - биринҷӣ
Мадина Қурбонзода (52 кг) - биринҷӣ
Ҳақназар Назаров (86 кг) - тилло
Кароматулло Ҳакимов (95 кг) - тилло
Улуғбек Раҳимов (95 кг) - биринҷӣ
Ёдовар мешавем, ки фонди ҷоизавии чемпионат 400 ҳазор доллари амрикоиро ташкил дод. Дар ҳамаи вазнҳо ба ғолибон 20 000 доллар, барандагони медали нуқра – 10 000 ва медали биринҷӣ 5 000 доллари амрикоӣ тақдим гардид.
Инчунин дастаҳое, ки аз ҳисоби медалҳо се ҷои аввалро гирифтанд, мутаносибан бо 5 000, 3 000 ва 2 000 доллари амрикоӣ сарфароз гардонида шуданд.
Бояд гуфт, ки ҷонвари нодири Тоҷикистон – бабри барфӣ рамзи нахустин Чемпионати ҷаҳон оид ба гӯштингирӣ пазируфта шуд.