Дарави гандуму ҷаву шолӣ, алаф (беда) ва шудгору молакунии заминҳои байни дарахтони боғ ва ҳам замини дохили гармхонаҳо дар шароити деҳотҷойҳо аз вижагии кори кишоварзӣ гуфта мешавад, ки иҷрои ин ҳамаро корҳоро дар вақти сохтани тарктори худ, хонандаи мактаб пешбинӣ кардааст
Муҳаммадҷон Яздонқулов, хонандаи синфи 8 и мактаби № 29 и шаҳри Панҷакент аст. Ду соли пеш ба сохтмони нахустин тарактор шурӯъ кард.
Трактори сохтаи ин хонандаи 15 солаи мактаб, ҳама аъзои ҳакамони озмунҳои ҷумҳуриявии “Ихтироъкорони наврас” ва “Илм- фурӯғи маърифат”дар шаҳрҳои Панҷакент ва Хуҷанду шаҳри Душанберо мутаҳайир кард.
Муҳаммадҷон бо трактори сохтаи худ то даври ниҳоии озмуни “Илм – фурӯғи маърифат” ба пойтахти Тоҷикистон рафта пирӯз шуд ва ба Панҷакент барои волидон ва коллективи устодонаш ифтихор овард.
Хабарнигори Sputnik Тоҷикистон ба шаҳри Панҷакент сафар кард ва аз Муҳаммадҷон дар бораи чи гуна сохтани тарактор ва аҳамияти он дар кори кишоварзӣ пурсид.
Зимни суҳбат Муҳаммадҷон Яздонқулов гуфт, ки сохтаи ӯ, аз тракторҳои сохти белорусӣ аз лиҳози ҳаҷм (андоза) хурд буда, он барои иҷрои як қатор корҳои кишоварзӣ аз ҷумла дарави ғалладонагиҳо ва шудгори заминҳои байни дарахтон хеле мувофиқ аст.
“Дар деҳотҷойҳо заминҳо майда – майда тақсим шудаанд ва барои самаранок истифода бурдан сокинон ҳам боғ кардаанду ҳам дар замини зери дарахтон зироат кишт мекунанд. Дар ин гуна заминҳо тракторҳои калони белорусиро ба кор даровардан ғайриимкон аст. Бино бар ин ман трактореро сохтам ин корҳо бе мушкилӣ иҷро карда шавад” – гуфт, Яздонқулов.