Об ба заминҳои ноҳияи Ҷаббор Расулов ҳудуди 20 рӯз дертар аз соли гузашта расида, ба кори кишоварзон халал ворид кардааст.
Деҳқонон ба он таъкид мекунанд, ки ҳар як рӯзи баҳор ғанимат буда, саривақтӣ шурӯъ намудани кор дар саҳро муҳим мебошад.
Уктам Мамадсобиров, роҳбари хоҷагии деҳқонӣ дар ноҳияи Ҷаббор Расулов, ки 1,4 га замини кишоварзӣ дорад, ба Sputnik Тоҷикистон гуфт, то ҳанӯз кишти зироатҳо пурра ба иҷро расонида нашудааст.
"Худи ҳамин рӯз об, омад мо ба шинонидани кучати помиддор машғулем. Мо дар 45 сотих пиёзу помидор, дар 5 сотих картошка ва дар 90 сотихи дигар пахта кишт мекунем. Соли гузашта 1 апрел об омода буд, имсол 20 рӯз дер об омад, ҳанӯз пахтаро кишт накардаем” - гуфт кишоварз.
Мазбут Эркаев, кишоварзи дигар аз ноҳияи Ҷаббор Расулов изҳор дошт, ки аз сабаби беобӣ кишти беда ва гандум дуруст насабзидааст.
"Зироати гандум як ваҷаб аст, беда низ ҳамчунин. Солҳои охир ҳосили ин навъ зироатҳо харҷи худашонро намепӯшонад. Сабабаш беобӣ аст. Ҳоло барқ нест, пойгоҳҳои обкашӣ кор накарда истодаанд", - фаҳмонд ӯ.
Пиёзпарвар аз ноҳияи Бобоҷон Ғафуров, Амирҷон Иброҳимов гуфт, ба фарқ аз соли гузашта, имсол ҳосили ин маҳсулот 20 рӯз дертар ба бозор арза мешавад.
"Қисме аз замини мо аз оби худҷорӣ ва қисме дигар аз ҳисоби оби чоҳи амудӣ обёрӣ мешавад, аммо имсол 15 - 20 рӯз дер иҷоза доданд, ки чоҳро ба кор андозем” – зикр кард, мусоҳиб.
Муовини сардори Сарраёсати кишоварзии Суғд, Маҳмудзода Абдуазиз, мегӯяд, ҳар қадаре, ки обрасонӣ ба таъхир уфтад, ин харҷи деҳқонон зиёд мешавад.
Ин масъули идораи кишоварзӣ ҷорӣ намудани имтиёзҳои барқрасонӣ ба идораи обёрии заминҳоро салоҳ медонанд.
Бар пояи иттилои Идораи кишоварзӣ дар вилояти Суғд, 250 ҳазор гектар замини кишоварзӣ мавҷуд аст, ки 75%-и он тавассути чоҳ ва пойгоҳҳои обкашӣ обёрӣ мешавад.
Дар соли 2023, дар киштзорҳои Суғд ба андозаи 1,4 млрд метри мукааб об бо арзиши қариб 30 млн сомонӣ ба иҷро расонида шудааст.