ДУШАНБЕ, 3 мар — Sputnik. Тоҷикистонро дар рӯзи охири мусобиқаи Tashkent Grand Slam 2024 дар вазнҳои болоӣ 4 ҷудокор намояндагӣ карданд.
Дар рӯзи охир сабқатҳо дар вазнҳои -90 кг, -100 кг ва +100 кг миёни мардон ва -78 кг ва +78 кг миёни бонувон баргузор гардиданд.
Ҷудокорони тоҷик Акмал Муродов ва Комроншоҳи Устопириён дар вазни то 90 кг, Ҷаҳонгир Маҷидов то 100 кг ва Шакармамад Мирмамадов дар вазни беш аз 100 кг майдондорӣ намуданд.
Муродов дар даври аввал аз Александр Сидорюк (AIN) шикаст хӯрда, аз идомаи мусобиқа бенасиб монд.
Устопириён дар вазни то 90 кг дар даври аввал озод буд ва дар даври дуюм аз Яҳор Варапайев (AIN) бохт. Мирмамадов аз ҷудокори турк - Мунир Эртуг шикаст хӯрд.
Маҷидов дар даври аввал муқобили Чандран Асвини ҳиндӣ пирӯз гардида, дар даври дуюм аз Шермуҳаммад Ҷандрееви ӯзбекистонӣ дучори бохт шуд.
Тими мунтахаби ҷудои Тоҷикистон бо нишони тиллои Эмомалии Нуралӣ мусобиқаи Tashkent Grand Slam 2024-ро ҷамъбаст намуд.
Маврид ба зикр аст, ки соли равон моҳи май дар шаҳри Душанбе низ мусобиқаи сайри ҷаҳонии ҷудо дар назар аст, ки интизор меравад, паҳлавонҳои номии дунё дар пойтахти Тоҷикистон ҷамъ оянд.