ДУШАНБЕ, 22 фев — Sputnik. Андозаи пардохти ҳатмӣ барои нобуд сохтани худравҳо аз навъи он вобаста буда, аз 360 то 2880 сомониро ташкил медиҳад.
Ба иттилои Вазорати нақлиёт, ҳаҷми ин пардохти ҳатмӣ барои соҳибони мотосикл - 360 сомонӣ ё 5 нишондиҳанда барои ҳисобҳо, барои мошинҳо ва дигар воситаҳои нақлиет, ки зиёда аз 10 нафарро интиқол медиҳанд - 1584 сомонӣ ё 22 нишондиҳанда барои ҳисобҳоро ташкил медиҳад.
Ин маблағ барои мошинҳои боркашу борбардорҳо - 2880 сомонӣ ё 40 нишондиҳанда барои ҳисобҳо муайян шудааст.
Соли равон ҳаҷми як нишондиҳанда барои ҳисобҳо дар Тоҷикистон 72 сомониро ташкил медиҳад.
Бар асоси тағйирот ба қонунгузорӣ, ки охири 2023 қабул гардид, пардохт аз ҷониби БДА ҳангоми ба қайди давлатӣ гузоштани воситаҳои нақлиёт пас аз барасмиятдарории гумрукӣ ва ҳангоми гузаронидани муоинаи ҳатмии давлатии техникӣ ситонда мешавад.
Маблағ як маротиба ситонида шуда, аз натиҷаи он ба соҳиби воситаи нақлиёт талон дода мешавад, ки то нобудсозӣ эътибор дорад.
Танҳо намояндагиҳои дипломатӣ, муассисаҳои консулии кишварҳои хориҷӣ ва созмонҳои байналмилалӣ, бо шарти аз ҳудуди ҷумҳурӣ бозпас баровардани воситаҳои нақлиёт озоданд. Инчунин мошинҳои шахсони воқеӣ ва ҳуқуқӣ, ки муваққатан ворид карда шудаанд, аз супоридани ин намуди пардохт озод карда мешаванд.