Даҳҳо мошини калони боркаш ба далели гароншавии рухсатномаи ҳамлу нақли автомобилӣ дар гузаргоҳи “Фотеҳобод – Ойбек" дар сарҳади Тоҷикистон ва Ӯзбекистон дармондаанд.
Хабарнигори Sputnik Тоҷикистон ба гузаргоҳи Фотеҳобод ба ноҳияи Масчоҳ рафт ва вазъи баамаломадаро аз ронандаҳо пурсид.
Яке аз ронандаҳои мошини боркаш, Мулломуҳатдӯст Наботов гуфт, ки сар аз аввали соли ҷорӣ рухсатнома камчин ва якбора гарон шуд.
"Мо намедонам, ки чаро нархи ин коғаз - рухсатнома якбора 100% баланд гардида 130 доллар шудааст. Ҳеҷ касе аз масъулин дар ин бора ба мо шарҳ намедиҳанд” – гуфт, ӯ.
Ронандаи дигар аз шаҳри Хуҷанд, Раҳимҷон Равшанзода, мегуяд, чунин нархгузорӣ барои онҳо зиёнбор аст.
"Барои расонидани бор аз Хуҷанд ба шаҳри Тошканд соҳиби бор ба мо 450 доллар роҳкиро медиҳад. Мо 220 доллар барои убури замини Ӯзбекистон пардохт мекунем, 130 доллар барои рухсатнома (дазвол) бар замми ин дар Тоҷикистон барои роҳ, тарозу, сӯзишворӣ пул медиҳем, ҳеҷ фоида нест" - гуфт ӯ.
Рухсатномаи ҳамлу нақли байналмилалӣ тавассути нақлиёти автомобилӣ аз ҷониби Хадамоти давлатии назорат дар соҳа ба ширкатҳои нақлиётӣ дода мешавад, ки онҳо навбати худ ба ронандагон мефурӯшанд. Санади мазкур бо шарикони тиҷоратӣ мувофиқа мешавад.
Баҳсҳо сари нархи ин санад ду сол қабл низ буд, ки якбора то садҳо доллар гарон шуда буд, аммо масъулини нақлиёт изҳор дошта буданд, ки нархи расмии он камтар аз 10 доллар мебошад ва бо чунин нарх ба ширкатҳои нақлиётӣ он дода мешавад. Ронандаҳо аз мақомот мехоҳанд ба мушкил расидагӣ кунанду тартиботу нархи расмиро ҷорӣ созанд.