ДУШАНБЕ, 31 янв — Sputnik. Байни Тоҷикистон ва Бонки Исломии Рушд чаҳор созишнома дар бахши рушди соҳаи маориф ба имзо расид.
Дар ин бора дафтари матбуоти Вазорати молияи кишвар хабар додааст.
Ба иттилои манбаъ, тарафҳо созишномаи қарзӣ, созишномаи грантии кумаки техникӣ, созишномаи қолабӣ ва Созишномаи агентӣ барои маблағгузории марҳилаи дуюми лоиҳаи "Дастгирии татбиқи Стратегияи миллии рушди маориф" ба имзо расид.
Созишномаҳоро дар Вазорати молияи кишвар вазири молия Файзиддин Қаҳҳорзода ва директори минтақавии Бонки Исломии Рушд дар Осиёи Марказӣ Иброҳим Шукрӣ ба имзо расониданд.
Мақсади маблағгузории марҳилаи дуюми лоиҳаи "Дастгирии татбиқи Стратегияи миллии рушди маориф"- ин мусоидат баҳри беҳтар намудани муҳити омӯзиш ва таҳкими низоми маориф дар Тоҷикистон тариқи навсозӣ ва васеъ гардонидани дастрасӣ ба инфрасохтори мактабӣ, ташкил ва тавсеаи низоми омӯзиши пайвастаи касбии омӯзгорон, ҷорӣ намудани арзёбии миллии омӯзиш ва мониторинги дастовардҳои таълим мебошад.
Арзиши созишномаҳо 70 млн долларро ташкил намуда, 45 млн доллар аз ҳисоби маблағҳои қарзии имтиёзноки Бонки Исломии Рушд ва 25 млн доллар аз ҳисоби гранти Фонди Шарикии глобалӣ дар соҳаи таҳсилот, ки тавассути Бонки Исломии Рушд маъмурӣ кунонида мешавад, маблағгузорӣ мегардад.