ДУШАНБЕ, 1 дек — Sputnik. Қариб тамоми нусхаҳои китоби Нурсултон Назарбоев "Ҳаёти ман. Аз вобастагӣ то озодӣ" аллакай харидорони худро ёфтаанду банд карда шудаанд, хабар медиҳад Sputnik Қазоқистон.
Китоб бо теъдоди 7,5 ҳазор нусха чоп шуда, дар Остона дар "Меломан" бо нархи 6,7 ҳазор танга фурӯхта мешавад.
Китоби мазкур 708 саҳифаро дар бар гирифта, аз ҳаёти шахсӣ то ҳаводиси сиёсии баъди рафтан аз қудрат дар он тавзеҳ дода шудаст.
Таваҷҷӯҳи бештар ба саҳифаи 607-ум шудаст, ки дар он Назарбоев дар бораи писаронаш аз зани дуюм Асел – Тауман ва Байкен сӯҳбат мекунад. Бузургӣ соли 2005, хурдӣ соли 2008 таваллуд шудааст.
Инчунин Нурсултон Назарбоев омилеро ном бурд, ки рӯйдодҳои январи соли 2022 дар Қазоқистонро ба гуфтаи ӯ оғоз бахшидаст.
Вай гуфт, вақте моҳи ноябри соли 2021 эълон кард, ки курсии раиси ҳизби ҳокими Нур Отанро ба Тоқаев месупорад, "касоне, ки ба ҳокимият тамаъ мекарданд, ба изтироб афтоданд".
Ба гуфтаи Назарбоев ин иқдом маънои пуштибонӣ аз номзадии Тоқаев дар интихоботи соли 2024-ро дошт, чун гумон меравад, ки шонси раҳбари ҳизб барои пирӯзӣ дар интихобот ба таври қобили мулоҳиза меафзояд.
Нахустин президенти Қазоқистон менависад, ки ӯ ният дошт дар авоили соли 2022 мақоми раиси Шӯрои амнияти ин кишварро ба Тоқаев супорад. Вай ин корро кард - аммо аллакай вақте ки дар кишвар нооромиҳои васеъ ба амал меомаданд.
Маврид ба зикр аст, ки Нурсултон Назарбоев нахустин президенти Қазоқистон мебошад, ки зимоми қудрат дар ин кишварро аз соли 1991 то 2019 дар даст дошт.