ДУШАНБЕ, 9 ноя — Sputnik. Мутахассиси хорватӣ Петр Сегрт, сармураббии тими Тоҷикистон барои бозӣ бо тимҳои Урдун (16 ноябр, Душанбе) ва Покистон (21 ноябр, Исломобод) 24 бозигарро даъват кардааст.
Ба иттилои Федератсияи футболи Тоҷикистон, аз ҷумла ситоди мураббиён 3 дарвозабон, 7 ҳимоятгар, 10 нимҳимоятгар ва 4 ҳамлагарро барои рақобат бо Урдун ва Покистон даъват намудаанд.
ФФТ тавзеҳ дод, ки Дастаи мунтахаби Тоҷикистон 10 ноябр дар шаҳри Душанбе омодагӣ ба бозиҳоро оғоз менамояд.
Ёдовар мешавем, ки қаблан мунтахаби Тоҷикистон барандаи "Ҷоми Мердека-2023" шуда буд.
Дар бозии ниҳоӣ барои "Ҷоми Мердека-2023" тими мунтахаби Тоҷикистон бар мунтахаби Малайзия бо ҳисоби 2:0 пирӯз шуд.
Дар марҳилаи қаблии ин мусобиқа дастаи Тоҷикистон тими Ҳиндустонро шикаст дода буд.
Маврид ба зикр аст, ки ба ин мусобиқаи байналмилалӣ мунтахаби Тоҷикистон таҳти роҳбарии Петр Сегрт бо бархе аз бозигарони нав рафт. Гуруҳе аз бозигарони тими "Истиқлол" ба далели омодагиҳо ба мусобиқаи дигар натавонистанд, ба Малайзия раванд.