ДУШАНБЕ, 13 сен — Sputnik. Вазирони умури хориҷаи Қазоқистон, Қирғизистон, Тоҷикистон, Туркманистон ва Ӯзбекистон дар Душанбе мулоқоте анҷом дода дар он асноди ниҳоии нишасти машваратии сарони кишварҳои Осиёи Марказӣ ва масоили байналмилалӣ ва минтақавиро баррасӣ хоҳанд кард.
Дар ин бора дафтари матбуоти вазорати умури хориҷаи Тоҷикистон хабар додааст.
Ба иттилои вазорат, маҷлиси вазирон таҳти раёсати вазири умури хориҷии Тоҷикистон Сироҷиддин Муҳриддин баргузор мешавад.
“Вазирони хориҷа лоиҳаи рӯзномаи ҷаласаи панҷуми машваратии сарони кишварҳои Осиёи Марказӣ ва рӯйхати асноди ниҳоиро баррасӣ ва тасдиқ хоҳанд кард”, - гуфтанд дар вазорат.
Вазорат қайд кардааст, ки вазирон ҳамчунин дар масъалаи рушди минбаъдаи ҳамкориҳо дар Осиёи Марказӣ ва масъалаҳои мубрами байналмилалӣ ва минтақавӣ табодули назар хоҳанд кард.
Вазорати умури хориҷа ёдовар шуд, ки рӯзи 12 сентябр дар Душанбе машваратҳои коршиносон дар масъалаи таҳияи асноди ниҳоии нишасти кишварҳои минтақа ва ҳамчунин нишасти Хазинаи байналмилалии наҷоти Арал баргузор шуд.
"Дар рафти машваратҳо матнҳои лоиҳаи изҳороти муштараки сарони давлатҳо дар пайи ҷаласаи панҷуми машваратии сарони кишварҳои Осиёи Марказӣ, изҳороти Душанбеи сарони давлатҳо – муассисони нишасти Хазинаи байналмилалии наҷоти Арал, инчунин бастаи Ҳуҷҷатҳои ниҳоии нишастҳои Душанбе мувофиқа карда шуданд", - иттилоъ додааст ВУХ.
Панҷумин нишасти машваратии сарони кишварҳои Осиёи Марказӣ рӯзҳои 14-15 сентябр дар Душанбе баргузор мешавад.
Ҳамчунин дар ин рӯзҳо баргузории ҷаласаи Шӯрои нишасти Хазинаи байналмилалии наҷоти Арал, ки соли 1993 бо ҳадафи рафъи бӯҳрони экологӣ ва беҳбуди вазъи иқтисодиву иҷтимоии ҳавзаи Арал таъсис ёфтааст, дар назар аст.