ДУШАНБЕ, 2 авг – Sputnik. Беш аз 20%-и нақшаи бунёдкорие, ки бахшида ба 35-солагии Истиқлоли давлатӣ таҳия шудааст, аллакай иҷро гардид.
Дар ин бора роҳбарияти Кумитаи меъморӣ ва сохтмони назди ҳукумати Тоҷикистон зимни нишасти матбуотӣ иттилоъ дод.
Ба гуфтаи манбаъ, дар доираи нақшаи чорабиниҳои ҷашни 35-солагии Истиқлоли давлатии Ҷумҳурии Тоҷикистон бунёди зиёда аз 28 ҳазор иншоот ба нақша гирифта шудааст.
"Ба ҳолати 1 июли соли равон 5,7 ҳазор иншоот ба истифода супорида шудааст, ки беш аз 20%-и нақшаро ташкил медиҳад", - омадааст дар иттилоия.
Ахиран ин ниҳод иттилоъ дод, ки дар 6 моҳи аввали соли равон дар Тоҷикистон ба масоҳати умумии қариб 773 ҳазор метри мураббаъ хонаҳои истиқоматӣ ба истифода дода шуданд.
Ба иттилои роҳбарияти Кумитаи меъморӣ ва сохтмони наздики ҳукумати Тоҷикистон, дар нимсолаи якуми соли 2023 инвеститсияи сармояи асосӣ аз ҳисоби ҳамаи манбаъҳои сармоядиҳӣ ба маблағи беш аз 8 млрд сомонӣ истифода шудааст.
Моҳҳои январ-июни соли равон фондҳои асосӣ ба маблағи беш аз 2,88 млрд сомонӣ ба кор андохта шудаанд, афзуд манбаъ.
Таъкид шудааст, ки иҷроиши корҳои сохтмонию васлгарӣ беш аз 7 млрд сомониро ташкил дод.