ДУШАНБЕ, 26 июн — Sputnik. Ба иттилои ВКД Тоҷикистон рӯзи 23-юми июни соли равон, тахминан соати 20:10-дақиқа дар кӯчаи Закариёи Розии ноҳияи Исмоили Сомонии шаҳри Душанбе, шаҳрванд Исматуллоев Шуҳрат, муовини раиси ҶСК "Ориёнбонк" аз ҷониби гуруҳи муташаккили ҷиноятӣ рабуда шудааст.
Манбаъ таъкид кардааст, ки номбурда аз ҷониби 4 шахси ношинос бо истифода аз қувваи ҷисмонӣ дастгир карда шуда, ба дохили воситаи нақлиёти тамғаи "Хюндай-Соната", рангаш сиёҳ, пурра сиёҳшиша маҷбуран савор карда, аз ҷойи ҳодиса ғайб заданд.
Ба иттилои ВКД ин шахсон бо хатсайри хиёбони Рӯдакӣ - Майдони сарҳадчиён - маҳаллаи Хуҷамбиёи Боло ҳаракат намуда, ба назди бозори Кӯшониён ба ҳудуди маҳаллаҳои Лучоб, Чағатай гузашта, ғайб задааст.
ВКД қайд кардааст, ки вобаста ба ин ҳодиса парвандаи ҷиноятӣ оғоз карда шуда тафтишотӣ пешакӣ ва чорабиниҳои оперативӣ-ҷустӯҷуӣ идома дорад.
Зикр карда шудааст, ки нафароне, ки барои ошкор намудани ин ҷиноят ба мақомоти ҳифзи ҳуқуқ мусоидат мекунанд ё хабар медиҳанд дар ҳаҷмӣ баробар ба 30 ҳазор доллар мукофотонида мешаванд.
Қайд карда шудааст, ки таъмини амнияти мусоидаткунандагон ва ифшо нашудани шахсияти онҳо кафолат ва ҳуқуқҳои онҳо ҳимоя карда мешавад.
Ёдовар мешавем, ки "Ориёнбонк" яке аз бузургтарин ва бонки низомсози Тоҷикистон ба ҳисоб меравад.