ДУШАНБЕ, 26 июн — Sputnik. Иёлоти Муттаҳида худ вазъиятеро ба вуҷуд овард, ки ҷаҳон ба ҷустуҷӯи алтернативаҳои доллари ИМА оғоз кард.
Дар ин бора Алексей Можин, директори иҷроияи Сандуқи Байналмилалии Пул (ХБА) аз Русия дар мусоҳиба бо РИА "Новости хабар дод".
"Худи амрикоиҳо вазъиятеро ба вуҷуд овардаанд, ки ҷустуҷӯи алтернативаҳо ба доллар ногузир ба кор даромад. Ҳоло мо мебинем, ки ин ҳама чӣ гуна сурат мегирад", - гуфт ӯ.
Аз ҷумла, чунон ки Можин гуфт, дар ҷаҳон дигар асъори миллӣ, пеш аз ҳама юани Чин бештар истифода мешавад.
"Мо мебинем, ки эрониҳо, бразилияҳо ва саудӣҳо на танҳо бо Чин, балки бо кишварҳои сеюм низ ба тиҷорат бо юан мегузаранд",- гуфт ӯ.
Коршинос қайд кард, ки амрикоиҳо аз сарнавишти доллар алакай нигаронанд ва даст кашидан аз ин асъор хеле зуд инкишоф меёбад.
“Маълум аст, ки ин дар як шабонарӯз рух намедиҳад, аммо ин раванд аллакай оғоз шудааст",-гуфт ӯ.
Ба гуфтаи Можин, омили аслии нақше, ки доллар дар иқтисоди ҷаҳонӣ ҳамчун пули захиравӣ ва василаи аслии пардохт ва пасандозҳо бозид, набуди алтернативаҳо будааст.
"Албатта, ин ягона омил нест. Қудрати низомии Амрико низ муҳим аст, он асъорро ҳифз мекунад. Андозаи иқтисоди Амрико, бахши молия низ омилҳост, аммо ба ҳар ҳол чизи асосӣ танҳо набудани алтернативаҳост",- гуфт номбурда
Вай афзуд, доллар пули миллӣ аст, ки “ба хотири манофеи миллӣ, уҳдадориҳои иқтисодӣ ва молии як кишвар” муомилот мешавад. Аз ин рӯ, нодуруст аст, ки он дар ҷаҳон ин қадар васеъ истифода ва татбиқ карда мешавад.