ДУШАНБЕ, 31 май — Sputnik. Дастаи мунтахаби Тоҷикистон таҳти роҳбарии мутахассиси хорватӣ Петр Сегрт барои тамринҳои дастаҷамъии даҳрӯза озими Тошканд гардиданд.
Ба иттилои ФФТ, дар ин даҳрӯза тими Тоҷикистон ба мусобиқаи "CAFA Nations Cup-2023", ки таҳти сарпарастии Ассотсиатсияи футболи Осиёи Марказӣ баргузор мешавад, омодагӣ мегирад.
Ба ҳайати ниҳоии тими миллии Тоҷикистон барои омодагӣ ва ширкат дар Ҷоми миллатҳои Ассотсиатсияи футболи Осиёи Марказӣ 26 бозигар ворид гардидаанд.
Петр Сегрт ба ҳайати мунтахаби миллии Тоҷикистон дар ин мусобиқаи байналмилалӣ, аз ҷумла 3 дарвозабон, 10 ҳимоятгар, 9 нимҳимоятгар ва 4 ҳамлагарро даъват кардаст.
Бояд гуфт, ки дар Ҷоми миллатҳои Ассотсиатсияи футболи Осиёи Марказӣ тими миллии Тоҷикистон дар гурӯҳи "А" бозӣ мекунад.
Дар ин гуруҳ футболбозони мунтахаби Тоҷикистон бо дастаи Туркманистон рӯзи 11 июн сабқат мекунад. Зӯрозмоӣ бо тими мунтахаби Уммон рӯзи 14 июн таъйин шудааст.
Дар доираи мусобиқаи Ҷоми миллатҳои Ассотсиатсияи футболи Осиёи Марказӣ сабқат бо дастаи Ӯзбекистон низ дар назар аст, ки 17 июн сурат мегирад.
Ба далели ин мусобиқаи байналмилалӣ, Федератсияи футболи Тоҷикистон мегӯяд, ки дар бозиҳои чемпионати ҷумҳурӣ тағйирот ворид шуд.
Аз ҷумла бозии даври дувоздаҳуми мусобиқаи қаҳрамонии Тоҷикистон-2023 байни бошгоҳҳои КМВА ва "Истиқлол"-и Душанбе, ки мебоист 3-юми июн баргузор гарданд, ба рӯзи эҳтиётии тақвим гузаронида шуданд.