ДУШАНБЕ, 24 май – Sputnik. Гран Прии Душанбе дар доираи мусобиқоти "Сайри ҷаҳонии ҷудо"-и Федератсияи байналмилалии ҷудо аввали июн дар назар буда, мусобиқаи интихобӣ ба Бозиҳои олимпии Париж-2024 мебошад.
Ба иттилои Федератсияи ҷудои Тоҷикистон, барои ширкат дар Гран Прии Душанбе ҳудуди 300 варзишгар аз 40 давлати дунё сабт ном шудаанд.
Аз ҷумла, тими мунтахаби Тоҷикистон ба ҳайси мизбон дар ҳайати 34 варзишгар – 28 мард, 6 зан – дар ин мусобиқа ширкат мекунанд, афзуд манбаъ.
Коллегияи мураббиён ва роҳбарияти Федератсияи ҷудои Тоҷикистон дар асоси дастовардҳо ва натиҷаи тамринҳо дар вазни то 60кг Муҳаммадсолеҳ Қувватов, Меҳрзод Суфиев, Ҳақдод Гулов, Муҳаммад Маҳмадизода интихоб кардаанд.
Дар вазни то 66кг Эмомалӣ Нуралӣ, Обид Ҷебов, Шаҳбоз Саидаброров, Фирӯз Мелибойзода, дар вазни то 73кг Беҳрӯз Хоҷазода, Муҳаммадшариф Наҷмиддинов, Абубакр Шеров, Мирзоҷамил Рамазонов намояндагӣ мекунанд.
Дар вазни то 81кг Сомон Маҳмадбеков, Шодмон Ризоев, Муҳаммадҷон Абдуҷалилзода, Сайфиддин Сайфиддинзода дар вазни то 90кг Комроншоҳ Устопириён, Ҷаҳонгир Маҷидов, Ҳақназар Назаров, Акмал Муродов сабқат мекунанд.
Абубакри Акобир, Исроил Раҳимов, Эмомризо Анварзода, Раҳматулло Мирзоев дар вазни то 100 кило, Темур Раҳимов, Мансур Раҳмон, Иброҳим Элмуродов, Шакармамад Мирмамадов дар вазни беш аз 100 кило зӯр меозмоянд.
Дар сабқати бонувон дар вазни то 48кг Шукрона Қарчиева, Мадина Қурбонзода, дар вазни то 52кг Аҳлия Муъминова, дар вазни то 57кг Шоҳида Қаландарова, Фазилат Гулбоева, дар вазни то 63кг Мавлуда Одинаева намояндагӣ мекунанд.