ДУШАНБЕ, 18 май — Sputnik. Эмомалӣ Раҳмон дар шаҳри Сиан бо намояндагони 40 ширкати бонуфузи сармоягузории Чин мулоқот карда, онҳоро ба Тоҷикистон даъват кард.
Президент таъкид кард, дар Тоҷикистон барои беҳтар намудани фазои сармоягузорӣ, бахусус дар соҳаҳои энергетика, нақлиёт, саноату кишоварзӣ, алоқа, молияву бонкдорӣ ва сайёҳӣ пайваста тадбирҳои зарурӣ андешида мешавад.
Би титтилои раисиҷумҳур дар Тоҷикистон зиёда аз садҳо ширкат бо саҳми сармоягузорони чинӣ дар соҳаҳои мухталифи иқтисодиёт фаъолият мекунад ва соли гузашта ҳаҷми гардиши мутақобилаи мол миёни ду кишвар, то 40% афзоиш ёфт..
Дар маҷмуъ, тайи 10 соли охир аз ҷониби сармоягузорони Чин ба иқтисодиёти Тоҷикистон 2,6 млрд доллар сармоя ворид гардидааст, ки беш аз 57%-и онро сармояи мустақим ташкил медиҳад.
Раҳмон ташаккули минтақаҳои саноатӣ ва таъсиси корхонаҳои металлургӣ, сементбарорӣ, нассоҷӣ, дӯзандагӣ, коркарди нафт ва тавлиди маҳсулоти саноати кимиёро аз самтҳои судманди ҳамкорӣ хонд.
Дар охир беш аз 8 ширкати чинӣ ҳавасмандии худро дар самти ҳамкорӣ бо Тоҷикистон дар соҳаҳои истихроҷу коркарди литий, мошинсозӣ, истеҳсоли батареяҳои офтобӣ, истихроҷу коркарди нафту газ ва хизматрасониҳои бонкӣ изҳор доштанд.